Joriy yilning 8 may kuni universitet katta majlislar zalida “Xotira va qadrlash kuni” umumxalq bayramiga bag‘ishlab “Inson qadri – ulug‘, xotirasi boqiydir” nomli bayram tadbiri bo‘lib o‘tdi. Tadbirga II Jahon urushi qatnashchilari va ularga tenglashtirilganlar, faxriy professor-o‘qituvchilar va iqtidorli talabalarning vakillari taklif etildilar. Universitet asosiy binosida fakultetlar tomonidan tashkil etilgan ko‘rgazma namoyish etildi. Bayram tadbirida hozirda universitetda faoliyat ko‘rsatayotgan, Ikkinchi jahon urushi davrida front ortida xizmat qilgan faxriylar, sobiq baynalminalchi harbiylar hamda 2012-2013 yillarda vafot etgan professor-o‘qituvchilarning oilalari moddiy rag‘batlantirildi. Shundan so‘ng iqtidorli va ijodkor talabalar tarkibidan shakllantirilgan ashula va raqs ansamblining bayram dasturi namoyish etildi. Bayram tadbirlari barcha fakultet va kafedralarda ham o‘tkazildi.

Joriy yilning 6 may kuni “Xotira va qadrlash kuni”ga bag‘ishlab universitet xotin-qizlar kengashi, ma’naviyat va ma’rifat bo‘limi, talabalar kasaba uyushmasi tomonidan filologiya fakultetining sobiq dekan o‘rinbosari E.Jumaeva xotirasiga bag‘ishlab universitet talaba-qizlari o‘rtasida voleybol bo‘yicha turnir bo‘lib o‘tdi. Qizg‘in bellashuvlarga boy bo‘lgan musobaqalarda tabiiyot-geografiya fakulteti talaba-qizlari 1-o‘rinni, pedagogika fakulteti talaba-qizlari 2-o‘rinni, hamda filologiya fakulteti talaba-qizlari 3-o‘rinni egallab turnir tashkilotchilarining maxsus diplomlari va mukofotlari bilan taqdirlandilar.

Joriy yilning 30 aprel kuni universitet katta majlislar zalida “Tafakkur sinovlari” respublika tanlovining viloyat bosqichi bo‘lib o‘tdi. Tanlovda FarDU, FarPI va QDPI talabalaridan tashkil topgan jamoalar tanlov nizomida belgilangan 4 ta shart bo‘yicha o‘zaro kuch sinashdilar. Unda talabalarning ijtimoiy-siyosiy ongi, ma’naviy dunyoqarashi, Prezident asarlarini bilish darajasi bo‘yicha bilimlari sinovdan o‘tkazildi. Tanlov yakuniga ko‘ra FarDU jamoasi 1-o‘rinni egallab, hududiy bosqichga yo‘llanmani qo‘lga kiritdi.

Joriy yilning 29 aprel kuni Axborot-resurs markazida Farg‘ona viloyati YXXB hodimlari bilan hamkorlikda uchrashuv "Yo‘l harakati havfsizligiga" bag‘ishlangan tadbir bo‘lib o‘tdi. Tadbirda viloyat YHHB boshlig‘i J.Kozimov, YHHB targ‘ibot-tashviqot katta inspektori Sh.G‘oyibnazarov hamda OAV hodimlari ishtirok etgan mazkur tadbirda mamlakatimizda harakat xavfsizligini ta’minlash borasida olib borilayotgan ishlar to‘g‘risida ma’lumotlar berildi. Ochiq muloqot shaklida o‘tkazilgan tadbirda professor-o‘qituvchilar va talabalar soha hodimlariga o‘zlarini qiziqtirgan savollari bilan murojaat qildilar. Uchrashuv so‘ngida yo‘l transport hodisalari bilan bog‘liq holatlarni aks ettiruvchi videolavhalar namoyish etildi.

Joriy yilning 24 aprel kuni universitet katta majlislar zalida “Kitobxonlar bayrami” madaniy-ma’rifiy tanlovining hududiy II bosqichi bo‘lib o‘tdi. Belgilangan nizomga asosan FarDU, FarPI, QDPI, TATU Farg‘ona filiali, TTA Farg‘ona filiali talabalari tanlovning 5 ta yo‘nalishi bo‘yicha ishtirok etdilar. Hakamlar hay’atining yakuniy hulosalariga ko‘ra, “Kitob tafakkur xazinasi” maqolalar tanlovi bo‘yicha FarDU filologiya fakulteti 1-kurs talabasi Nafisa Rashidova, “Eng faol badiiy asar targ‘ibotchisi” nominatsiyasi bo‘yicha FarDU filologiya fakulteti 3-kurs talabasi Go‘zal Ergasheva, “Yosh ijodkor talaba” nominatsiyasi bo‘yicha QDPI filologiya fakulteti 1-kurs talabasi Umida Hoshimova, “Asarlardan yaralgan navolar” nominatsiyasi bo‘yicha QDPI filologiya fakulteti talabalari Muslima Karimova va Mahliyo Bahodirzoda, “Asarlardan yaralgan sahna asarlari” nominatsiyasi bo‘yicha FarDU talabalar jamoasi g‘olib deb topildi. G‘oliblar tanlovning respublika bosqichida Farg‘ona oliy o‘quv yurtlari sharafini himoya qiladi.

29 aprel kuni universitet hududidagi ochiq sahnada “Kelajak ovozi” yoshlar tashabbuslar markazi tomonidan e’lon qilingan tanlovlar targ‘ibotiga bag‘ishlangan aksiya bo‘lib o‘tdi. “Kelajak ovozi” faollari tomonidan tashkillangan mazkur tadbirda faol talabalarning chiqishlari, ijtimoiy videoroliklar namoyishi hamda turli sahna ko‘rinishlariga keng o‘rin berildi. Aksiyada mingga yaqin talabalar ishtirok etdi.