Farg`ona davlat universiteti

GANDBOLCHILARIMIZ TALABALARIMIZ FINALDA

“Yangi O‘zbekiston talabalari olimpiadasi” doirasida o‘tkazilayotgan sport musobaqalarida Farg‘ona davlat universiteti gandbol jamoasi yana bir muhim natijani qayd etdi. Jamoamiz yarim final bosqichida munosib raqib sanalgan Andijon davlat pedagogika instituti jamoasiga qarshi maydonga tushib, ishonchli va yirik hisobdagi g‘alabani qo‘lga kiritdi hamda musobaqa finaliga yo‘llanma oldi.

Uchrashuv davomida universitetimiz talabalari yuqori sport mahorati, taktik savodxonlik va jamoaviy hamjihatlik namunasini ko‘rsatdilar. Bahsning ilk daqiqalaridanoq tashabbusni o‘z qo‘liga olgan gandbolchilarimiz hujum va himoyadagi aniq harakatlari bilan raqibga imkoniyat qoldirmadilar. Har bir o‘yinchi g‘alaba uchun bor kuchini safarbar etib, jamoaning yakuniy muvaffaqiyatiga munosib hissa qo‘shdi.

Mazkur natija sportchilarimizning muntazam mashg‘ulotlari, murabbiylar mehnati va jamoaning yuksak maqsad sari intilishining amaliy ifodasi bo‘ldi. Musobaqa davomida namoyish etilgan qat’iyat, iroda va g‘alabaga bo‘lgan ishonch Farg‘ona davlat universiteti jamoasini final bosqichiga olib chiqdi.

Final yo‘llanmasining qo‘lga kiritilishi nafaqat gandbol jamoamiz, balki universitetimiz sport hayoti uchun ham muhim voqea hisoblanadi. Bu yutuq talaba-yoshlar orasida sportni keng targ‘ib etish, sog‘lom turmush tarzini qaror toptirish hamda yosh sportchilarning yangi marralarni zabt etishiga xizmat qiladi.

Farg‘ona davlat universiteti jamoasini ushbu yorqin muvaffaqiyat bilan samimiy tabriklaymiz. Final uchrashuvida ham ularga kuch-g‘ayrat, matonat, omad va munosib g‘alaba tilaymiz. Ishonamizki, sportchilarimiz hal qiluvchi bahsda ham o‘z mahoratini namoyon etib, universitetimiz sharafini munosib himoya qiladilar.