Farg`ona davlat universiteti

ILHOM, MULOQOT VA YANGI TASHABBUSLAR

Farg‘ona davlat universiteti Filologiya fakulteti tomonidan talabalar turar joyida tashkil etilgan “Kafedra kuni” tadbiri talabalarga ilm va ma’rifat muhitini yaqinlashtirish, ularning qiziqish va tashabbuslarini qo‘llab-quvvatlash yo‘lida muhim qadamlardan biri bo‘ldi.

Tadbirda universitet rektori Bahodirjon Shermuhammadov shaxsan ishtirok etib, talabalarga yaratilgan sharoitlar, mavjud imkoniyatlar va istiqbolli rejalar haqida batafsil ma’lumot berdi.

Uchrashuv davomida talabalar bilan ochiq va samimiy muloqotga kirishgan rektor, ularga universitet kutubxonasi, o‘quv xonalari, darsdan tashqari mashg‘ulotlar, ilmiy va ijodiy to‘garaklar faoliyatini yanada samarali tashkil etish bo‘yicha tavsiyalar berdi.

Shuningdek, universitetda olib borilayotgan ma’naviy-ma’rifiy ishlar, madaniy tadbirlar, sport va ijtimoiy loyihalarning talaba shaxsini har tomonlama rivojlantirishdagi o‘rni alohida ta’kidlandi.

Rektor: “Siz – nafaqat bilim oluvchi, balki tashabbuskor yoshlar bo‘lishingiz zarur”

Bahodirjon Shermuhammadov suhbat davomida talabalar faolligini qo‘llab-quvvatlash, ularning qiziqishlariga mos shart-sharoitlar yaratish, bo‘sh vaqtni mazmunli o‘tkazish orqali ijtimoiy faollikni oshirish zarurligini qayd etdi.

— “Zamon bilan hamnafas, fikrlovchi, tashabbuskor va barkamol yoshlarni tarbiyalash — bizning eng ustuvor vazifamiz. Talabalar nafaqat darslarda, balki o‘z tashabbuslari bilan ham universitet hayotiga ijobiy hissa qo‘shishi kerak,” — deya ta’kidladi universitet rektori.

Tadbir davomida talabalar o‘zlarini qiziqtirgan savollar bilan murojaat qilishdi, o‘z taklif va tashabbuslarini bildirishdi. Ushbu ochiq muloqot nafaqat yoshlar bilan bog‘liqlikni mustahkamladi, balki ularning ovozi eshitilayotganidan dalolat berdi.