Farg`ona davlat universiteti

FarDUDA FUTBOLGA ZAMONAVIY YONDASHUV

FarDU — bu nafaqat bilim maskani, balki sog‘lom avlod kamol topayotgan zamonaviy universitetdir!

Bugungi kunda O‘zbekiston futboli yuksalish bosqichini boshdan kechirmoqda. Mamlakat miqyosida professional futbol klublari, bolalar-o‘smirlar sport maktablari va oliy ta’lim muassasalaridagi futbol jamoalari faoliyati yangi bosqichga ko‘tarilmoqda. Ushbu jarayonda Farg‘ona davlat universiteti (FarDU) ham faol ishtirok etmoqda.

FarDU futbol klubi universitet sport hayotining ajralmas qismiga aylangan bo‘lib, nafaqat sportchilarni, balki butun universitet jamoasini birlashtiruvchi kuchga aylanmoqda. Bugun zamonaviy futboldan ortda qolmaslik, respublika va xalqaro musobaqalarda munosib ishtirok etish uchun universitet rahbariyati tomonidan futbol jamoasiga barcha zarur sharoitlar yaratib berilmoqda.

Zamonaviy futbolda faqatgina jismoniy tayyorgarlik emas, balki taktik tahlil, raqib o‘yinini chuqur o‘rganish va ilmiy yondashuv ham muhim o‘rin tutadi. Shu maqsadda, FarDU futbol jamoasiga zamonaviy texnika vositalari bilan jihozlangan, video tahlil va nazariy mashg‘ulotlar o‘tkazish imkonini beruvchi maxsus xonalar ajratildi.

Endilikda murabbiylar jamoasi o‘yinlar yozuvlarini tahlil qilib, har bir o‘yinchining kuchli va zaif jihatlarini aniqlash, raqib jamoalarning taktikasini o‘rganish hamda mashg‘ulotlarni individual rejalashtirish imkoniyatiga ega bo‘ladi. Bu esa nafaqat jamoa o‘yinini takomillashtirishga, balki yosh futbolchilarni professional darajaga tayyorlashga xizmat qiladi.

FarDU futbol jamoasining asosiy maqsadi — nafaqat universitet nomini sport sohasida yuqori cho‘qqilarga olib chiqish, balki talabalarga sog‘lom turmush tarzini targ‘ib qilish, ularning sportga bo‘lgan qiziqishini oshirishdir. Jamoa safida o‘ynayotgan yoshlar orasidan ko‘plab iqtidorlar yetishib chiqmoqda va ular kelajakda professional futbolchilar safini to‘ldirishi kutilmoqda.