Farg`ona davlat universiteti

GENERAL BILAN UCHRASHUV

Farg‘ona davlat universitetida yoshlar uchun muhim va mazmunli tadbir bo‘lib o‘tdi. Farg‘ona viloyati ichki ishlar boshqarmasi boshlig‘i, general-mayor Azizbek Ikramov universitet talaba-yoshlari bilan samimiy va ochiq muloqotda bo‘ldi.

Uchrashuv universitet rahbariyati tashabbusi bilan tashkil etilib, bugungi globallashuv davrida yoshlarda huquqiy ong, ijtimoiy faollik va zamonaviy xatarlar haqida xabardorlikni oshirish maqsadini ko‘zladi.

Tadbirni ochib bergan universitet rektori, professor Bahodirjon Shermuhammadov o‘z so‘zida yurtimizda Prezidentimiz rahnamoligida olib borilayotgan keng ko‘lamli islohotlar, oliy ta’lim tizimidagi yangilanishlar, yoshlar salohiyatiga qaratilayotgan e’tibor haqida to‘xtaldi. Ayniqsa, FarDU talabalari tomonidan erishilayotgan yutuqlar, ilmiy-ijodiy faoliyat va xalqaro hamkorlik bo‘yicha ortib borayotgan salohiyat alohida ta’kidlandi.

Uchrashuvda general-mayor Azizbek Ikramov yoshlar bilan bevosita muloqotga kirishar ekan, bugungi zamon talablariga mos bilim, huquqiy savodxonlik va fuqarolik mas’uliyati haqida fikr bildirdi. Quyidagi dolzarb mavzular yuzasidan talabalarga batafsil ma’lumotlar berildi:

• -Axborot xurujlari va ijtimoiy tarmoqlardagi tahdidlar;
• -Kiberjinoyatchilik va undan himoyalanish yo‘llari;
• -Globallashuv davrida milliy qadriyatlarni asrash;
• -Kelajak kasblari va zamonaviy ko‘nikmalar;
• -Yoshlarning huquqiy madaniyatini oshirish zarurati.

“Bugun sizlar axborot oqimida yashayotgan avlodsiz. Tanlovlaringiz, qarorlaringiz va bilimlaringiz nafaqat o‘z kelajagingiz, balki jamiyatning ertangi kunini belgilaydi,” — dedi Azizbek Ikramov.

Uchrashuv davomida talabalar o‘zlarini qiziqtirgan savollar, taklif va fikrlarini bevosita generalga yo‘llash imkoniyatiga ega bo‘lishdi. Suhbat jarayoni ochiq va samimiy ruhda o‘tib, barcha savollarga aniq, asosli va hayotiy javoblar berildi.

Tadbir yakunida joriy yilda eng yuqori ball bilan universitetga qabul qilingan iqtidorli yoshlarga kitoblar jamlanmasi sovg‘a qilindi. Bu esa bilimga, kitobxonlikka va ma’naviy o‘sishga bo‘lgan rag‘batning yana bir yaqqol namunasi bo‘ldi.

Farg‘ona davlat universiteti yoshlar bilan tizimli va maqsadli ishlash, ularni nafaqat mutaxassis, balki har tomonlama yetuk shaxs sifatida tarbiyalash yo‘lida samarali tashabbuslarni davom ettirmoqda.

Bugungi uchrashuv esa talabalarning huquqiy savodxonligi, ongli tanlovlar va ijtimoiy faolligini oshirish sari muhim qadam bo‘ldi.