Farg`ona davlat universiteti

“SALOMATLIK UCHUN 5000 QADAM” LOYIHASI: SOGLOM HAYOTGA BIRGALIKDA QADAM

Farg‘ona davlat universitetida sog‘lom turmush tarzini targ‘ib qilish maqsadida “Salomatlik uchun 5000 qadam” loyihasi muvaffaqiyatli o‘tkazildi. Ushbu tadbir universitet professor-o‘qituvchilari, ishchi xodimlari va faol talaba yoshlarni birlashtirdi.

“Salomatlik uchun 5000 qadam” loyihasi ishtirokchilari birgalikda kunlik qadam sonini oshirish orqali o‘z sog‘ligini yaxshilash, kayfiyatni ko‘tarish va o‘zaro hamjihatlikni kuchaytirishni maqsad qilgan. Bu tashabbus har birimiz uchun oddiy, ammo samarali vosita bo‘lib, jismoniy faollikni kundalik hayotga singdirishni rag‘batlantiradi.

Tadbir davomida universitetning barcha bo‘limlari va fakultetlaridan yig‘ilgan ishtirokchilar bir necha ming qadamni bosib o‘tib, birgalikda sog‘lom hayotga intilishdi. Professor-o‘qituvchilar va talabalar o‘zaro muloqotda bo‘lib, sog‘lom turmush tarzi haqida fikr almashdilar hamda o‘zlarini qo‘llab-quvvatlash muhitini yaratdilar.

Loyihada qatnashgan talaba va xodimlar shunday dedilar:

“Kundalik 5000 qadam — bu kichik qadam bo‘lishi mumkin, lekin uning ta’siri katta. Bu loyiha orqali sog‘ligimizni yanada yaxshilash va bir-birimizni rag‘batlantirish imkoniyatiga ega bo‘ldik.”

“Salomatlik uchun 5000 qadam” loyihasi Farg‘ona davlat universitetida muntazam ravishda o‘tkazilishi rejalashtirilgan. Bu orqali sog‘lom turmush tarzini targ‘ib qilish, talabalar va professor-o‘qituvchilar o‘rtasida do‘stona va ijobiy munosabatlarni mustahkamlash maqsad qilinmoqda.