Farg`ona davlat universiteti

FARG’ONA DAVLAT UIVERSITETIDA XOTIN - QIZLAR FAOLLIGIGA BAG’ISHLANGAN RESPUBLIKA KONFERENSIYA

Farg‘ona davlat universiteti qoshidagi Gender tengligi tadqiqotlar markazida "Xotin-qizlarning jamiyat ijtimoiy-iqtisodiy va ma’naviy-madaniy hayotidagi faolligini oshirishning gender omillari" mavzusida respublika miqyosidagi konferensiya bo‘lib o‘tdi. Tadbir onlayn va oflayn formatda tashkil etilib, unda mamlakatimizdagi yetakchi tashkilotlar, davlat idoralari, fuqarolik jamiyati institutlari, ilmiy muassasalar vakillari hamda professor-o‘qituvchilar va talabalar faol ishtirok etdilar.

Konferensiyaning asosiy maqsadi — bugungi kunda xotin-qizlarning turli sohalardagi faolligini oshirish, ularning huquq va imkoniyatlarini kengaytirish, shuningdek, gender tenglikka erishish yo‘lida mavjud to‘siq va muammolarni aniqlash va ularni bartaraf etish bo‘yicha tavsiyalar ishlab chiqishdan iborat bo‘ldi.

Tadbirda O‘zbekiston Respublikasi Oila va xotin-qizlar qo‘mitasi, “Adolat” sotsial-demokratik partiyasi, Oliy ta’lim, fan va innovatsiyalar vazirligi, hamda boshqa qator tashkilotlar vakillari ishtirok etdilar. Konferensiya doirasida quyidagi asosiy yo‘nalishlar bo‘yicha muhokamalar olib borildi:

Xotin-qizlarning ta’lim tizimidagi ishtiroki va yetakchiligi;

Mehnat bozori va ishbilarmonlikda ayollarning iqtisodiy imkoniyatlari;

Ayollarning boshqaruv va qaror qabul qilish jarayonlarida faol qatnashuvi;

Ijtimoiy himoya, sog‘liqni saqlash, huquqiy madaniyat va ma’naviy qadriyatlar kontekstida gender masalalari.

Konferensiya ishtirokchilari tomonidan so‘zga chiqilgan ma’ruzalar, tahliliy mulohazalar va aniq raqamlar asosida xotin-qizlarning bugungi ijtimoiy mavqei, duch kelayotgan muammolar, mavjud imkoniyatlar chuqur tahlil qilindi. Shuningdek, quyidagi amaliy tavsiyalar ilgari surildi:

Xotin-qizlar o‘rtasida liderlik ko‘nikmalarini rivojlantirish bo‘yicha maxsus dasturlarni kengaytirish;

Ayollar tadbirkorligini qo‘llab-quvvatlash uchun moliyaviy savodxonlik bo‘yicha treninglarni yo‘lga qo‘yish;

Talaba-qizlar uchun mentorlarcha tizimni joriy etish;

OAVda xotin-qizlar obrazini ijtimoiy mas’uliyatli yondashuv asosida yoritish.

Mazkur konferensiya nafaqat ilmiy-nazariy, balki amaliy ahamiyat kasb etdi. Unda ilgari surilgan fikr va takliflar mamlakatimizda gender siyosatini yanada takomillashtirish, xotin-qizlarning barcha sohalardagi ishtirokini kuchaytirish borasidagi chora-tadbirlarni shakllantirishda muhim asos bo‘lib xizmat qiladi.

Farg‘ona davlat universiteti bunday tashabbus va tashkiliy ishlar orqali jamiyatda gender tengligini qaror toptirish, ayollarning faol, bilimli va mas’uliyatli fuqarolar sifatida jamiyat taraqqiyotiga qo‘shayotgan hissasini e’tirof etadi hamda bu yo‘nalishda o‘z ilmiy, metodik va ijtimoiy faoliyatini davom ettiradi.

“Xotin-qizlarning faolligi — jamiyat taraqqiyotining kafolati!”