Farg`ona davlat universiteti

XALQARO ILMIY-AMALIY ANJUMAN

Farg‘ona davlat universitetining Tarix fakulteti mezbonligida “Markaziy Osiyo tarixining dolzarb muammolari va tadqiqotlar istiqboli” mavzusida xalqaro ilmiy-nazariy konferensiya bo‘lib o‘tdi. Ushbu nufuzli ilmiy tadbir mintaqaning o‘tmish merosi, tarixiy jarayonlarini chuqur o‘rganish, mavjud muammolarni muhokama qilish va kelajakdagi hamkorlik istiqbollarini belgilashga xizmat qildi.

Konferensiyada O‘zbekiston bilan birga Qozog‘iston, Hindiston, Rossiya, Turkiya kabi mamlakatlardan taniqli tarixchilar, professor-o‘qituvchilar, yosh tadqiqotchilar va doktorantlar ishtirok etdilar. Tadbir ilm-fan sohasi vakillari uchun g‘oyalar almashinuvi, ilmiy yondashuvlarni muhokama qilish hamda mintaqaviy muammolarga kompleks yondashuvlarni ishlab chiqish imkoniyatini yaratdi.

Konferensiya kun tartibidagi asosiy yo‘nalishlar:

• - Markaziy Osiyo tarixini o‘rganishning zamonaviy metodologiyasi;
• - Mintaqaviy siyosiy va iqtisodiy aloqalar tarixi;
• - Suv resurslari va ekologik xavfsizlik masalalari tarixiy kontekstda;
• -Buyuk ipak yo‘li va savdo madaniyatining shakllanishi;
• - Shaharsozlik va urbanizatsiya jarayonlari tarixi;
• - Diniy va madaniy merosni saqlash, tadqiq etish va targ‘ib qilish;
• -Ilmiy fikrlar chorrahasi.

Ma’ruzalar davomida olimlar mintaqa tarixini o‘rganishda duch kelinayotgan dolzarb masalalarni tahlil qildilar. Jumladan, Markaziy Osiyoning o‘zaro bog‘liq tarixiy taqdiri, transchegaraviy hamkorlik zarurati, arxiv manbalarni to‘plash va tahlil qilishdagi metodik yondashuvlar, madaniy yodgorliklarni ilmiy saqlash bo‘yicha ilg‘or tajribalar bo‘yicha chuqur fikrlar bildirildi.

Konferensiya yakunida mavzular bo‘yicha qizg‘in munozaralar tashkil etildi, ishtirokchilar o‘z ilmiy qarashlari bilan o‘rtoqlashdilar. Shuningdek, kelgusida qo‘shma tadqiqotlar o‘tkazish, xalqaro nashrlarda ilmiy maqolalar chop etish, yosh tadqiqotchilar uchun akademik almashinuv dasturlarini yo‘lga qo‘yish masalalari muhokama qilindi.

Bunday xalqaro ilmiy anjumanlar nafaqat tarixiy haqiqatni yoritish, balki mintaqada tinchlik, barqarorlik va taraqqiyotga xizmat qiluvchi ilmiy hamkorlikni mustahkamlashda ham muhim ahamiyatga ega. Farg‘ona davlat universiteti esa bunday muloqotlar uchun ochiq maydon bo‘lib qolaveradi.

“Ilmiy hamkorlik – mintaqaviy barqarorlik garovi”, — degan g‘oya konferensiyaning asosiy mazmuniga aylandi.