Farg`ona davlat universiteti

OTMga KIRISH TEST SINOVLARI QIZG’IN DAVOM ETMOQDA

2025-yil uchun Oliy ta’lim muassasalariga kirish imtihonlari mamlakat bo‘ylab yangi formatda va yuqori tashkiliy darajada o‘tkazilmoqda. Xususan, Farg‘ona viloyatida ham test sinovlari bosqichma-bosqich o‘tkazilayotgani abituriyentlar va ularning ota-onalari tomonidan katta qiziqish bilan kuzatilmoqda.

Imtihonlar 6 ta hududda o‘tkazilmoqda

Joriy yilda Farg‘ona viloyati bo‘yicha test sinovlari quyidagi 6 ta asosiy hududda tashkil etilgan:

1. Farg‘ona shahri

2. Qo‘qon shahri

3. Marg‘ilon shahri

4. Rishton tumani

5. Quva tumani

6. Buvayda tumani

Mazkur hududlarda joylashgan yirik sport zallari, kollejlar va universitetlar binolari zamonaviy test markazlariga aylantirildi.

Farg’ona davlat universitetida test sinovlari ikki smenada o‘tkazilmoqda

Farg‘ona davlat universitetining Sport-sog‘lomlashtirish majmuasi esa eng yirik imtihon markazlaridan biri hisoblanadi. Bu yerda har kuni minglab abituriyentlar test sinovlarida ishtirok etmoqda. Sinovlar ikki smenada tashkil etilgan:

Ertalabki smena: Soat 08:00 da boshlanadi

Kechki smena: Soat 15:00 da boshlanadi

Majmua hududida testlar uchun barcha qulayliklar yaratilgan: o‘tirish joylari, sovitish tizimlari, tibbiy xizmat, ichimlik suvi nuqtalari va tartibni nazorat qiluvchi mas’ullar joylashtirilgan.

Test jarayonlarining shaffof va adolatli o‘tishini ta’minlash maqsadida har bir hududda videokuzatuv kameralari o‘rnatilgan. Abituriyentlarning ruxsatnomalari QR-kod asosida tekshirilmoqda. Bundan tashqari:

Shaxsni aniqlovchi hujjatlar asosida kirish nazorati yo‘lga qo‘yilgan raqamli identifikatsiya tizimi orqali imtihonga kirish amalga oshirilmoqda.

Tashqi nazoratchilar, huquq-tartibot organlari vakillari va tibbiyot xodimlari jarayonni kuzatmoqda.

Abituriyentlar uchun eslatma:

Imtihonga kelayotgan abituriyentlarga quyidagilar tavsiya etiladi:

Belgilangan vaqtdan kamida 1 soat oldin imtihon joyida bo‘lish;

Shaxsni tasdiqlovchi hujjat (pasport yoki ID-karta) va imtihon ruxsatnomasini o‘zlari bilan olib kelish;

Elektron qurilmalar, telefondan foydalanmaslik va tartibga rioya qilish.

Farg‘ona viloyatida tashkil etilgan test sinovlari yoshlarning kelajagiga yo‘l ochib beruvchi muhim bosqichdir. Farg‘ona davlat universiteti hududida yaratilgan shart-sharoitlar esa bu jarayonni yanada ishonchli, adolatli va xavfsiz tarzda o‘tishini ta’minlamoqda.

Imtihon natijalari Milliy test markazi (DTM) tomonidan rasmiy sayt orqali bosqichma-bosqich e’lon qilinadi.