Farg`ona davlat universiteti

FARG’ONA DAVLAT UNIVERSITETI DELEGATSIYASI XITOYDA: XALQARO ILMIY HAMKORLIKDA YANGI BOSQICH

Farg‘ona davlat universiteti delegatsiyasi Xitoyning Henan provinsiyasi, Jengjou shahrida bo‘lib o‘tayotgan Shanghay Hamkorlik Tashkilotining Media va Tahlil sammiti doirasidagi “Madaniy merosni muhofaza qilish va qazuv tadqiqotlarini rivojlantirish” simpoziumida ishtirok etmoqda.

Ushbu nufuzli simpozium doirasida madaniy merosni asrash, arxeologik tadqiqotlar samaradorligini oshirish va ilmiy kadrlar tayyorlash borasida bir qator xalqaro masalalar muhokama qilindi. Xususan:

• -Henan provinsiyasi Arxeologiya instituti bilan hamkorlikda qo‘shma tadqiqotlar olib borish;
• - Shimoli-g‘arbiy universitet bilan arxeologiya sohasida kadrlar tayyorlash va tajriba almashish;
• - Xitoy Fanlar akademiyasining Paleontologiya va paleoantropologiya instituti bilan zamonaviy laboratoriyalar tashkil etish masalalari muhim muhokama markazida bo‘ldi.

Sammit davomida Farg‘ona davlat universitetining Arxeologiya kafedrasi professori Mutalibjon Xasanov va Henan provinsiyasi Madaniy meros agentligi direktori Ren Wei ilmiy ma’ruzalar bilan ishtirok etishdi. Ma’ruzalar madaniy merosni ilmiy asosda o‘rganish, arxeologik boyliklarni zamonaviy yondashuvlar bilan asrash yo‘nalishlarida katta qiziqish uyg‘otdi.

Simpozium yakunida tomonlar o‘rtasida quyidagi kelishuvlarga erishildi:

• - Luoyang Arxeologik tadqiqot instituti bilan hamkorlikda Farg‘ona davlat universiteti talabalari uchun arxeologik amaliyotlarni tashkil etish;
• - O‘zbekiston-Xitoy hamkorligida qo‘shma o‘quv-amaliyot markazi ochilish marosimini tashkil qilish;
• - Hamkorlikni ilmiy, texnik va pedagogik yo‘nalishlarda kengaytirish bo‘yicha memorandum loyihalari ustida ishlash.

Ushbu tashrif Farg‘ona davlat universitetining xalqaro ilmiy maydondagi nufuzi ortib borayotganidan dalolatdir. FDU delegatsiyasining Xitoydagi ishtiroki – bu kelajak avlod arxeologlari uchun mustahkam ilmiy poydevor demakdir.