Farg`ona davlat universiteti

“BUYUK TARIX VA MADANIYAT MARKAZI" GA SAYOHAT

Tarix – bu shunchaki o‘tmish emas, balki millatning o‘zligini anglash, qadriyatlarini his qilish va kelajak sari dadil qadam tashlash demakdir. Shu maqsadda Tarix fakulteti talabalari tomonidan #Ichki_turizm yo‘nalishida “Buyuk tarix va madaniyat markazi” deya e’tirof etiladigan Qo‘qon shahriga ma’naviy-ma’rifiy sayohat tashkil etildi.

Qo‘qon shahri – nafaqat ichki va ziyorat turizmi markazi, balki hunarmandchilik an’analari va boy tarixiy merosi bilan mashhur maskandir. Sayohat davomida talabalar shaharning tarixiy muhitini his etib, qadimiy obidalar bilan yaqindan tanishdilar.

Safarning asosiy manzili – Xudoyorxon saroyi bo‘ldi. Mazkur saroy XIX asrda bunyod etilgan bo‘lib, o‘zining betakror me’morchiligi, naqshinkor bezaklari va tarixiy eksponatlari bilan ajralib turadi.

Muzey hududida talabalar:

Qo‘qon xonligi davriga oid noyob eksponatlar bilan tanishdilar

Saroy arxitekturasi va bezak san’atining o‘ziga xos jihatlarini o‘rgandilar

Xonlik davridagi siyosiy, ijtimoiy va madaniy hayot haqida batafsil ma’lumot oldilar

Gidlar tomonidan berilgan tarixiy ma’lumotlar yoshlarning nazariy bilimlarini mustahkamlash bilan birga, ularda jonli tarixiy tasavvur hosil qildi.

Qo‘qon shahri “hunarmandchilik shahri” sifatida ham mashhur. Sayohat davomida talabalar milliy amaliy san’at namunalarini ko‘zdan kechirdilar, ustalarning mahorati va qadimiy an’analar davomiyligiga guvoh bo‘ldilar. Bu esa ularda milliy qadriyatlarga hurmat va qiziqishni yanada kuchaytirdi. Ma’naviy boyish va unutilmas taassurotlar

Mazkur sayohat talabalarning tarixiy bilimlarini boyitish, ichki turizmni rivojlantirish hamda yurtimizning boy madaniy merosini chuqurroq anglashga xizmat qildi.

“Buyuk tarix va madaniyat markazi”ga uyushtirilgan ushbu tashrif yoshlar qalbida faxr va iftixor tuyg‘ularini uyg‘otib, ularda o‘z tarixiga bo‘lgan qiziqishni yanada mustahkamladi.