Farg`ona davlat universiteti

FARDUDA O‘ZBEK–HIND MADANIY HAMKORLIGI VA NAVRO‘Z SHUKUHI

Farg‘ona davlat universiteti filologiya fakultetida bahorning eng go‘zal ayyomi — Navro‘z xalqaro ruhda keng nishonlandi. Ushbu bayram nafaqat milliy qadriyatlarni ulug‘lash, balki xalqlar o‘rtasidagi do‘stlik va madaniy aloqalarni mustahkamlashga xizmat qilgan unutilmas tadbirga aylandi.

Tadbirning nufuzli mehmonlari sifatida Hindistonning yetakchi oliy ta’lim muassasalari vakillari — Mazhar Asif hamda Shahbaz Amil tashrif buyurdi. Mehmonlar o‘zbekona mehmondo‘stlik an’analari asosida, milliy kuy va tantanali marosimlar bilan kutib olindi.

Bayram davomida talabalar tomonidan o‘zbek va hind xalqlarining boy madaniyatini aks ettiruvchi kuy-qo‘shiqlar, milliy raqslar va sahna ko‘rinishlari namoyish etildi. Rang-barang liboslar, milliy ohanglar va jo‘shqin chiqishlar tomoshabinlarga unutilmas taassurot qoldirdi.

Bu chiqishlar ikki xalq o‘rtasidagi madaniy uyg‘unlik va o‘zaro hurmatni yana bir bor namoyon etdi.

Tadbirning eng ta’sirli jihatlaridan biri — Zahiriddin Muhammad Bobur siymosining sahnada gavdalantirilishi bo‘ldi. Bobur shaxsining tarixiy merosi O‘zbekiston va Hindistonni bog‘lovchi muhim ko‘prik sifatida talqin etildi.

Ushbu sahna ko‘rinishlari hindistonlik mehmonlarda katta taassurot qoldirib, ikki xalq o‘rtasidagi tarixiy ildizlarning naqadar chuqur ekanini yana bir bor eslatdi.

Navro‘z bayrami doirasida o‘tkazilgan ushbu tadbir nafaqat bahor va yangilanish timsoli, balki xalqlar o‘rtasidagi do‘stlik, o‘zaro hurmat va madaniy hamkorlik ramzi sifatida ham namoyon bo‘ldi.

Farg‘ona davlat universitetida tashkil etilgan bunday xalqaro tadbirlar talabalarning dunyoqarashini kengaytirib, ularni global madaniy muhitda faol ishtirok etishga undaydi.

Bugungi kunda Farg‘ona davlat universiteti xalqaro hamkorlikni rivojlantirish, turli davlatlar bilan ilmiy va madaniy aloqalarni kengaytirish borasida izchil ishlar olib bormoqda. Mazkur Navro‘z tadbiri esa ana shu sa’y-harakatlarning yorqin ifodasiga aylandi.