Farg`ona davlat universiteti

YOSHLAR KUNI: YOSHLAR TASHABBUSLARI — E’TIBOR MARKAZIDA

Farg‘ona davlat universitetida Yoshlar kuni munosabati bilan keng ko‘lamli ma’rifiy va amaliy tadbirlar tashkil etilib, unda talabalar faolligi, tashabbuslari va kelajak rejalari muhokama markaziga aylandi. Tadbirlar yoshlarning ijtimoiy faolligini oshirish, ularni qo‘llab-quvvatlash hamda mavjud imkoniyatlar bilan yaqindan tanishtirishga qaratilgani bilan ahamiyatli bo‘ldi.

Universitetning Fizika-matematika, Sport faoliyati hamda Jismoniy madaniyat fakultetlarida “Dekan va yoshlar uchrashuvi” formatida ochiq muloqotlar tashkil etildi. Ushbu uchrashuvlarda talabalarga Shavkat Mirziyoyev tomonidan yoshlarga yaratilayotgan imkoniyatlar, shuningdek, universitet rektori Bahodirjon Shermuhammadov tashabbuslari haqida batafsil ma’lumotlar berildi. Odob-axloq kodeksi, ichki tartib-qoidalar hamda ta’lim sifatini oshirishga doir masalalar yuzasidan fikr almashildi.

Eng muhimi, uchrashuvlar davomida talabalar o‘z muammolari, takliflari va tashabbuslarini erkin bildirish imkoniga ega bo‘ldilar. Bu esa ta’lim jarayonini yanada takomillashtirishga xizmat qiladigan muhim muloqot maydonini yaratdi.

Yoshlar bilan ishlash doirasidagi yana bir e’tiborga molik tadbir Iqtisodiyot fakultetida bo‘lib o‘tdi. “Ayollar biznesiga birinchi qadam” mavzusidagi davra suhbatida talaba-qizlarning tadbirkorlik salohiyatini rivojlantirish, innovatsion g‘oyalarini qo‘llab-quvvatlash masalalari muhokama qilindi. Unda tajribali tadbirkor K. Amirbekova o‘z biznes faoliyati misolida muvaffaqiyat sari yo‘l, uchraydigan muammolar va ularning yechimlari haqida qimmatli tavsiyalar berdi. Shuningdek, xotin-qizlar masalalari bo‘yicha dekan maslahatchisi D. Uzganbayeva va professor-o‘qituvchilar ham faol ishtirok etdilar.

Bitiruvchi talabalar bandligini ta’minlash maqsadida “Kelajakka qadam” dasturi doirasida alohida uchrashuvlar ham o‘tkazildi. “Chaqiriqqacha harbiy ta’lim” yo‘nalishi bitiruvchilari bilan bo‘lib o‘tgan ochiq muloqotda kredit olish imkoniyatlari, loyihalar ishlab chiqish, tadbirkorlikni yo‘lga qo‘yish hamda o‘z-o‘zini band qilish mexanizmlari keng yoritildi.

Huquqshunoslik fakultetida tashkil etilgan navbatdagi uchrashuv esa yanada dolzarb mavzularni qamrab oldi. Unda Rishton tumanlararo sudi raisi Ulug‘bek Oripov ishtirok etib, talabalar bilan ochiq va samimiy muloqot olib bordi. Suhbat davomida sud-huquq tizimidagi islohotlar, ularning jamiyat hayotidagi o‘rni va ahamiyati batafsil tushuntirildi.

Shuningdek, uchrashuvda oilaviy zo‘ravonlikning oldini olish, korrupsiyaga qarshi kurashish hamda yoshlar o‘rtasida giyohvandlikning salbiy oqibatlari kabi muhim masalalarga alohida e’tibor qaratildi. Bu esa talabalarda huquqiy ong va ijtimoiy mas’uliyatni mustahkamlashga xizmat qildi.

Umuman olganda, Farg‘ona davlat universitetida o‘tkazilgan Yoshlar kuni tadbirlari yoshlarning fikrini tinglash, ularni qo‘llab-quvvatlash va kelajakka ishonch bilan qadam tashlashlari uchun muhim platformaga aylandi. Bu kabi tashabbuslar esa, shubhasiz, yurtimizda yoshlar siyosatining izchil va samarali amalga oshirilayotganidan dalolat beradi.