Farg`ona davlat universiteti

FARDU TALABALARI SAN’AT HAFTALIGIDA PORLADI: OLTIN, KUMUSH VA BRONZA YUTUQLAR!

Fargʻona davlat universiteti talabalari yana bir bor o‘z iste’dodi va ijodiy salohiyatini namoyon etdi. Joriy yilning 20 va 24-aprel kunlari Oʻzbekiston Badiiy Akademiyasi tashabbusi bilan o‘tkazilgan xalqaro tasviriy va amaliy san’at festivali doirasidagi san’at haftaligi FarDU yoshlari uchun katta muvaffaqiyatlarga boy bo‘ldi.

Respublikaning barcha hududlarida yuqori saviyada tashkil etilgan ushbu san’at haftaligi yosh ijodkorlar uchun o‘z iste’dodini namoyish etish, tajriba almashish va professional san’atkorlar bilan muloqot qilish imkonini yaratdi. Festival davomida turli ko‘rgazmalar, ijodiy uchrashuvlar va tanlovlar tashkil etilib, unda mamlakatimizning eng iqtidorli yosh rassomlari ishtirok etdi.

Pedagogika-psixologiya va san’atshunoslik fakulteti tasviriy san’at yo‘nalishi talabalari katta o‘qituvchi A. A’zamjonov rahbarligida faol qatnashib, yuksak natijalarga erishdi. Ularning ijodiy ishlari hakamlar hay’ati tomonidan yuqori baholanib, quyidagi natijalar qayd etildi:

- M. Axadjonova — oltin medal;

- H. Bannopov — kumush medal;

- G. Komilova — bronza medal.

Ushbu yutuqlar FarDU talabalari nafaqat hududiy, balki respublika miqyosida ham kuchli raqobatbardosh ekanini yana bir bor tasdiqladi.

San’at haftaligi davomida yosh ijodkorlar o‘z asarlari orqali milliy qadriyatlar, zamonaviy g‘oyalar va ijodiy izlanishlarni uyg‘unlashtirishga muvaffaq bo‘lishdi. Bu esa ularning nafaqat texnik mahorati, balki keng dunyoqarashi va estetik didi yuqori darajada ekanini ko‘rsatadi.

FarDU talabalari erishgan ushbu muvaffaqiyatlar universitetda yaratilgan ijodiy muhit, sifatli ta’lim va ustoz-shogird an’analarining samarali natijasidir. Bunday yutuqlar yoshlarni yanada katta marralar sari ilhomlantirib, milliy san’atimiz rivojiga munosib hissa qo‘shishiga zamin yaratadi.