Farg`ona davlat universiteti

“TO‘MARIS IZDOSHLARI” SPORT MUSOBAQASINING VILOYAT BOSQICHI YUQORI SAVIYADA O‘TKAZILDI

Yoshlar o‘rtasida sog‘lom turmush tarzini keng targ‘ib etish, jismoniy faollikni oshirish hamda iqtidorli sportchi-talabalarni qo‘llab-quvvatlash maqsadida tashkil etilgan “To‘maris izdoshlari” sport musobaqasining Farg‘ona viloyati hududiy bosqichi ko‘tarinki ruhda bo‘lib o‘tdi.

Mazkur musobaqa Oliy ta’lim, fan va innovatsiyalar vazirligi tashabbusi bilan tashkil etilib, unga Farg‘ona davlat universiteti mezbonlik qildi. Tadbir viloyatdagi oliy ta’lim muassasalari o‘rtasida sportni rivojlantirish va talaba-yoshlarning bo‘sh vaqtini mazmunli tashkil etishda muhim ahamiyat kasb etdi.

Musobaqaning viloyat bosqichida jami 5 ta jamoa faol ishtirok etib, ular o‘zaro kuch sinashdi. Bellashuvlar davomida ishtirokchilar nafaqat jismoniy tayyorgarlik, balki jamoaviy hamjihatlik, tezkor qaror qabul qilish va yetakchilik qobiliyatlarini ham namoyon etdilar. Har bir chiqish tomoshabinlar va hakamlar hay’ati tomonidan katta qiziqish bilan kuzatildi.

Qizg‘in va murosasiz kechgan bahslar yakunida quyidagi natijalar qayd etildi:

1-o‘rin — FarDU jamoasi
2-o‘rin — Farg‘ona davlat texnika universiteti
3-o‘rin — Qo‘qon davlat universiteti

G‘olib va sovrindor jamoalar tantanali ravishda esdalik sovg‘alari bilan taqdirlanib, musobaqaning keyingi — respublika bosqichida ishtirok etish huquqini qo‘lga kiritdilar.

“To‘maris izdoshlari” musobaqasi nafaqat sport bellashuvi, balki yoshlar orasida do‘stlik, birdamlik va sog‘lom raqobat muhitini mustahkamlovchi muhim platforma sifatida alohida ahamiyat kasb etmoqda. Bu kabi tadbirlar yoshlarning har tomonlama barkamol bo‘lib ulg‘ayishida muhim omil bo‘lib xizmat qiladi.