Farg`ona davlat universiteti

XALQARO ILMIY ANJUMAN

Farg‘ona davlat universitetida bugun “Chet tillar va adabiyotini o‘qitishning zamonaviy yondashuvlari” mavzusida nufuzli xalqaro ilmiy anjuman bo‘lib o‘tdi. Mazkur tadbir xorijiy hamkor universitetlar, soha mutaxassislari hamda ilmiy izlanuvchilarni bir maydonga jamlab, zamonaviy ta’limning dolzarb masalalarini muhokama qilish uchun muhim platformaga aylandi.

Anjumanda Universiti Sains Malaysia (USM), Osh davlat universiteti hamda Webster University vakillari, universitetning ingliz tili va adabiyoti fakulteti professor-o‘qituvchilari, yetakchi olimlar va tadqiqotchi talabalar faol ishtirok etdilar. Xalqaro miqyosdagi ushbu uchrashuv turli mamlakatlar tajribasini birlashtirib, ta’lim sifatini oshirish va ilmiy hamkorlikni rivojlantirishga xizmat qildi.

Anjuman davomida chet tillarini o‘qitish metodikasi, zamonaviy tilshunoslik muammolari va pedagogik innovatsiyalar yuzasidan qator dolzarb mavzular muhokama qilindi. Ayniqsa, sun’iy intellektning ta’lim jarayoniga kirib kelishi, raqamli texnologiyalarning chet tillarini o‘qitishdagi o‘rni hamda pedagoglarning “soft skills” — muloqot, liderlik va moslashuvchanlik kabi ko‘nikmalarini rivojlantirish masalalari ishtirokchilar e’tibor markazida bo‘ldi.

Tadbirning muhim jihatlaridan biri Universiti Sains Malaysia (USM) bilan uchinchi bor qo‘shma anjuman o‘tkazilgani bo‘ldi. Jahon reytingida yuqori o‘rinlardan birini egallab kelayotgan mazkur universitet bilan hamkorlik FarDUning xalqaro aloqalari tobora kengayib borayotganidan dalolat beradi. Tomonlar o‘rtasida ilgari yo‘lga qo‘yilgan akademik aloqalarni yanada mustahkamlash va yangi qo‘shma loyihalarni amalga oshirish masalalari yuzasidan fikr almashildi.

Shuningdek, FarDU va USM o‘rtasida 1+1 modeli asosida qo‘shma magistratura dasturini kengaytirish bo‘yicha muhim muzokaralar olib borildi. Uchrashuv davomida mazkur dastur samaradorligini oshirish, talabalar almashinuvi va qo‘shma ilmiy tadqiqotlarni rivojlantirish bo‘yicha aniq takliflar ishlab chiqildi. Bu esa talabalar uchun xalqaro ta’lim imkoniyatlarini yanada kengaytirishga xizmat qiladi.

Mazkur xalqaro anjuman nafaqat ilmiy muloqot maydoni, balki zamonaviy ta’lim tendensiyalarini o‘rganish, xorijiy tajribani o‘zlashtirish va universitetlararo hamkorlikni yangi bosqichga olib chiqish uchun muhim qadamlardan biri bo‘ldi. FarDUda tashkil etilayotgan bunday nufuzli tadbirlar universitetning xalqaro akademik maydondagi mavqeini yanada mustahkamlamoqda.