Farg`ona davlat universiteti

YANA BIR ILMIY MUVAFFAQIYAT

Farg‘ona davlat universiteti ilmiy salohiyati yuksalib borayotgan oliy ta’lim maskani sifatida navbatdagi muhim ilmiy yutuqqa guvoh bo‘ldi. Universitetning Tarix fakulteti, O‘zbekiston tarixi kafedrasi katta o‘qituvchisi Nazirov Mirjalol Baxodirjon o‘g‘li tarix fanlari bo‘yicha falsafa doktori (PhD) ilmiy darajasini olish uchun taqdim etgan dissertatsiya ishini muvaffaqiyatli himoya qildi.

Farg‘ona davlat universiteti huzuridagi ilmiy kengash majlisida 07.00.01 – O‘zbekiston tarixi ixtisosligi bo‘yicha ko‘rib chiqilgan “Farg‘ona viloyatidagi migratsion jarayonlar tarixi (1876–1917-yillar)” mavzusidagi ilmiy tadqiqot mintaqa tarixining dolzarb va kam o‘rganilgan jihatlaridan birini yoritishi bilan alohida e’tibor qozondi.

Mazkur dissertatsiyada XIX asr oxiri va XX asr boshlarida Farg‘ona viloyatida kechgan migratsion jarayonlar, aholi ko‘chishining ijtimoiy-siyosiy omillari, mustamlakachilik davrining demografik o‘zgarishlarga ta’siri hamda hududning iqtisodiy va madaniy rivojiga ko‘rsatgan ta’siri chuqur ilmiy asosda tahlil etilgan. Tadqiqot o‘zining tarixiy manbalarga tayanganligi va ilmiy yangiligi bilan tarixshunoslik uchun muhim ahamiyat kasb etadi.

Ilmiy kengash yig‘ilishida tadqiqotchi o‘z dissertatsiyasining maqsadi, vazifalari, ilmiy yangiliklari va amaliy ahamiyatini atroflicha bayon qildi. Kengash a’zolari tomonidan berilgan savollarga asosli javoblar taqdim etildi hamda ishning dolzarbligi yuqori baholandi.

Yakunda ilmiy kengash a’zolarining yakdil qarori bilan dissertatsiya ishi 100 foiz ovoz bilan muvaffaqiyatli himoya qilingani e’lon qilindi. Bu natija yosh olimning izchil ilmiy mehnati, tarixiy tadqiqotlarga bo‘lgan chuqur yondashuvi va ilm-fanga qo‘shayotgan munosib hissasining e’tirofi bo‘ldi.

Mazkur muvaffaqiyat nafaqat muallifning shaxsiy yutug‘i, balki Farg‘ona davlat universitetida ilmiy tadqiqotlar va yosh olimlarni qo‘llab-quvvatlash borasida amalga oshirilayotgan samarali ishlarning amaliy natijasidir. Ayniqsa, mintaqaviy tarixning muhim masalalariga bag‘ishlangan bunday tadqiqotlar milliy tarixshunoslik rivojiga salmoqli hissa qo‘shadi.

Universitet jamoasi Nazirov Mirjalol Baxodirjon o‘g‘lini ushbu muhim ilmiy muvaffaqiyat bilan samimiy muborakbod etadi va kelgusidagi ilmiy faoliyatida yangi yutuqlar tilaydi.